英格蘭超級足球聯賽真係計曬數—全人類都睇住凌晨三點果場曼城主場打曼聯，因為聽日又係勞動節公眾假期既原因，所以場波唔係星期六又或者係星期日，讓路俾班球迷睇左其他賽事先：反正人人今晚都睇呢場波架嘞，咪一於擺係今日等大家做多日生意啦！

英國人都可算係最早研究足球經濟學既國家，由運動經濟學者「斯文斯基」(Stefan Szymanski) 同文化人「西門急拍」(Simon Kuper) 合作出版既《Soccernomics》更加瘋魔全世界，啟發左唔少人以足球為題材去分析一些嚴肅既題目，好似除左足球經濟學之外，仲有足球政治學、人類學、心理學、管理學等等。最近「斯文斯基」同「西門急拍」修訂左佢地本經典，新出版既《足球經濟學》亦多左分析人性，特別係「點解有人會睇波？」以及「點解有人會唔再睇波？」呢兩個問題。有趣既係兩位專家發現大部份人鐘意睇波並唔係因為係某一隊球隊既死硬派「粉絲」：就算係英國呢個有咁多熱血又忠心既球迷既國家，根據過去六十一年既統計數字，只有極少數買年票既人係會每一年都緊跟一隊球隊。例如尋晚以六比一狂炒昆士柏流浪既車路士，佢地2006年既時候做既統計，發現九成既「粉絲」係三年前都係仲未鐘意車路士而支持其他球隊既。

但係，原來比賽成績以及有邊位球員係隊波入面，亦唔係球迷睇波既最主要原因噃：專家發現係統計學上，球迷睇唔睇波既最關鍵原因，既唔係個球隊品牌、亦唔係賽績同球星，而係個球場！個個座得舒服、成班人睇得開心，球迷就自然入黎睇波架嘞—好似阿仙奴咁，離開左高貝利球場之後都未攞過獎，但係新既酋長球場既入座率一路都升。所以香港要推動足球事業，搞好個球場先啦。亦都因為睇波氣氛好，酒吧先咁爆！最後講下點解球迷會由睇波轉做唔再睇波，原來唔關個人老左定工作忙左，而係打假波：好似2006年意大利五大球會打假波，之後咁多年佢地比起其他球隊流失多兩成球迷！

(本聲音專欄只反映主持人及個別參與人士的個人意見。)