早前特首選戰鬥得如火如荼之時，不論娛樂版或港聞版記者，當然唔會蝕底，先後訪問城中一眾所謂較出色的堪輿學家，後命相、名字多方面推算預測邊位會贏出當特首。結果出，竟然咁多個事前都話唐唐會贏，無人計到係振英哥當選，真後乜無晒癮，拆晒佢招牌，好在唔係年尾，否則佢來年運程書肯定滯銷，事關二份一機會都估唔中，叫人點信你。
其實，堪輿學呢門學問，可以話係以統計學及心理學為基本，從而演化出各門各派。例如今次特首選舉，相信早期大家都認為唐唐機會好大，差不多係要封盤大熱，但世事難料，大熱倒灶司空見慣，今次「爆冷」原因唔使多講，某方後台失勢，連以為坐定粒六的最後才知畀人玩鋪勁，班支持者落錯注畀人跣鋪勁，跳船都跳唔切咁滯。今次有人認為等同有匹馬埋門落飛得手，連跟都無得跟。
類似情況好似跑馬一樣，賽前一面倒大熱倒灶絕對唔係新聞，十幾蚊馬隨時三甲不入，可能馬匹陣上有意外，又或幕後嫌熱縮番條槓都唔定，一眾馬評人貼士齊齊跌眼鏡。所以某程度上馬評家與堪輿家處境十分相似，好多客觀環境都係完全無法控制，只是一廂情願的依理預測，背後原因及變數就真係無得計。