作為免費電視龍頭大台，製作出嚟嘅節目，更加絕對唔容許有偏頗，或者影響市民嘅睇法。最近無記嘅「沒女真人騷」，當中嘅個案女主角，被心理學家剷到盡，言詞令觀眾反感，搞到要去投訴，香港臨床心理學家協會都覺得節目過火，擔心影響真正有需要求助嘅市民卻步。
咁又係，對於從未睇過心理醫生嘅人嚟講，唔多唔少都會以為或希望好似電影《無間道》咁，喺一個舒服嘅環境、一張瞓到令人唔願起身嘅高級座椅，有位好似Kelly咁溫柔又靚女嘅治療師，相信對好多觀眾嚟講，有錢、有時間的話，都願意去搵佢哋傾下偈，之但係，無記呢個真人騷，當中所謂心理輔導嘅過程，真係未必人人頂得住，本身燥底嘅可能會打人，弱小心靈嘅隨時諗得更負面，總之連帶嘅影響可以好大。
家下觀眾要求高，要做一個叫好又叫座嘅節目真係唔易，過去嘅「剩女真人騷」可以叫做成功引起社會話題，但其實並不代表觀眾鍾意呢類尖酸刻薄、譁眾取寵嘅節目，如果香港人變成咁嘅口味，就認真恐怖。至於所謂嘅真人騷，其實都只係一個綜藝節目，問心嗰句，喺製作上一定有加鹽加醋，呢啲無人怪你，但去得太盡的話，就好容易弄巧反拙，有時幫人同埋害人，就係只差一線。最後，女人天生鍾意人哄、讚，就算本身無咩本錢可以炫耀或被賞識都係咁話，被公開批評，甚至被謾罵，點都會有唔冧，不過，嗰位女主角好特別，接受訪問時話好感激節目中嘅心理治療師，呢個奇特反應，確係有好大嘅空間俾大家去思考，係咪一場戲呢？
 

王奇雲    (逢周一至五刊載)